Symudiad Morwellt: dechrau gwaith cynllun cenedlaethol

Yn gyntaf oll - fy enw i yw Carl Gough.

Bron i dri mis i mewn i'm rôl fel Rheolwr Prosiect ar gyfer y Cynllun Gweithredu Morwellt Cenedlaethol (NSAP), ac rwy'n teimlo ei bod yn hen bryd am ddiweddariad. 

Dyma fy mlog cyntaf i gyflwyno fy hun a dal i fyny â chi ar ble mae pethau'n sefyll.

Y stori hyd yma:

Fel y trafodwyd yn y blog blaenorol, cyflwynodd Rhwydwaith Morwellt Cymru (SNC) y cynnig ar gyfer y Cynllun Gweithredu i Lywodraeth Cymru ym mis Gorffennaf 2024. Yn dilyn hyn, sicrhawyd rhywfaint o gyllid cychwynnol ym mis Tachwedd trwy'r Cynllun Grant Rheoli Ardaloedd Morol Gwarchodedig i gefnogi 15 mis o weithrediadau. Roedd hyn yn cynnwys recriwtio Rheolwr Prosiect – gan arwain at i mi ymgymryd â'r rôl ddiwedd mis Mawrth eleni.

Yn y tri mis cyntaf hyn, rydw i wedi bod yn adolygu, asesu, gwerthuso, rhwydweithio a chynllunio. Rhan fawr o fy rôl yw dod â strwythur a chefnogi llywodraethu da fel y gall gwaith aelodau'r SNC symud ymlaen yn hyderus a chysylltu'n effeithiol â phrosiectau a mentrau perthnasol eraill.

Pwy ydw i?

Syrthiais mewn cariad â'r môr pan symudodd fy nheulu i Gernyw pan oeddwn i ond yn saith oed. Fuon ni ddim yno'n hir, ond roedd yr halen wedi treiddio i fy ngwaed, ac mae wedi aros yno byth ers hynny.

Roedd fy ngyrfa gynnar mewn swyddi dyfrol, a arweiniodd at rolau mewn acwaria cyhoeddus a pharciau sŵolegol. Meithrinodd hyn awydd go iawn i wybod mwy felly dychwelais i'r byd academaidd fel myfyriwr aeddfed i gwblhau fy ngraddau. Yr hyn nad oeddwn wedi ei ragweld oedd sut y byddai fy ngwaith gyda chymuned a chadwraeth yn fy arwain i fyd datblygu cymunedol. Yn ystod yr 20 mlynedd diwethaf, rydw i wedi bod yn rhan o gydlynu strategaethau lleol a rhanbarthol, cefnogi datblygu mentrau cymdeithasol, a brocera partneriaethau i gyflawni effaith gymdeithasol ac amgylcheddol ystyrlon.

Mae camu i'r rôl newydd hon gyda SNC yn teimlo ychydig fel dod adref – yn ôl i wyddoniaeth forol a chadwraeth, ond gyda blwch offer o sgiliau a mewnwelediadau o'r sectorau cymunedol a mentrau cymdeithasol y gallaf nawr eu defnyddio i gefnogi cyflawni'r weledigaeth a ymgorfforir yn y Cynllun Gweithredu Morwellt Cenedlaethol.

Beth sydd nesaf?

Bydd yr ychydig fisoedd nesaf yn ymwneud â rhoi cynlluniau ar waith. Mae hyn yn cynnwys lansio gweithgorau i hyrwyddo blaenoriaethau’r Cynllun Gweithredu, a gwella cyfathrebu fel bod aelodau’r SNC yn aros mewn cysylltiad a bod cynulleidfaoedd allanol yn gallu dilyn ein cynnydd.

Rwyf hefyd yn awyddus iawn i ehangu cysylltiadau y tu hwnt i’r rhwydwaith presennol. Un o’r pethau mwyaf pwerus am wellt y môr yw nad dim ond cadwraeth amgylcheddol ydyw! Mae adfer morwellt yn cefnogi pob un o 17 Nod Datblygu Cynaliadwy’r Cenhedloedd Unedig ac mae’n cyd-fynd yn gryf â Deddf Llesiant Cenedlaethau’r Dyfodol (Cymru). O gefnogi economïau lleol trwy bysgodfeydd a thwristiaeth, i gynnig atebion sy’n seiliedig ar natur ar gyfer erydiad arfordirol a gwydnwch hinsawdd, i wella bioamrywiaeth ac ansawdd dŵr, mae llawer i’w garu am wellt y môr. Felly, os hoffech wybod mwy, cysylltwch â mi, byddwn wrth fy modd yn clywed gennych.

Y Cynllun Gweithredu Morwellt Cenedlaethol yw ymrwymiad Cymru i atal colli morwellt o amgylch arfordiroedd Cymru erbyn 2030 a dyblu ei faint erbyn 2050. Rydym yn falch mai Cymru yw’r genedl gyntaf yn y byd i ymrwymo i gynllun cenedlaethol cydlynol ar gyfer adfer morwellt. Nid yn unig y mae’r Cynllun Gweithredu wedi cael ei gymeradwyo gan Lywodraeth Cymru, ond mae hefyd wedi derbyn cydnabyddiaeth a chanmoliaeth gan Gymdeithas Morwellt y Byd.

“Mae’n gosod esiampl y gall Cymdeithas Morwellt y Byd gyfeirio ati wrth gynorthwyo sefydliadau eraill sy’n ceisio cynrychiolaeth debyg o systemau morwellt mewn polisi.” 
[Yr Athro Emma Jackson, Llywydd Cymdeithas Morwellt y Byd]

Cadwch mewn cysylltiad:
Bydd blogiau gan aelodau SNC yn ymddangos yma’n rheolaidd

Dilynwch ni ar LinkedIn [@seagrass-network-cymru]

Neu anfonwch e-bost ataf yn NSAP@projectseagrass.org os hoffech sgwrsio neu drefnu cyfarfod neu gyflwyniad i’ch tîm